Sa ekspozision la pran nesans dan enn sante ki apel "nu lakaz". Sa sante la dekrir sinpleman enn peizaz dan enn vilaz ki pena non, kot limanite finn disparet, kot lisien pe kontign lager ek kot Soley finn vinn lerwa. Dan sa zistwar ki derul apre limanite, res ankor bann tras so lafwa. Enn lafwa ki'nn pran plas pu ranpli sa dut imans ki'nn manz tu dimunn ziska lafin. Galri Imaaya pe akey sa sante la sou form enn dekor ki les otan plas a limazinasion ki sante ki'nn inspir li. Dan sa peizaz la ena buku kestion ki kapav flote... Ou pa. Ki'nn arive? Eski ena ankor dimunn dan bann lavil otur ou limanite antie inn disparet? Ki derule andeor sa peizaz la? Eski vremem sa pu arive nu? Dan ki zafer mo krwar? Kifer mo krwar dan sa bann zafer la? Dan ki lemond mo viv? Kuma mo pe viv da sa lemond la ? Dan ki lemond mo pe anvi viv? Eski mo anvi viv ou mo anvi disparet?... Dan sa lespas la, kot lamor finn anrasine... lavi pu pran plas pandan 1 mwa. Lamizik, performans, sesion tatwaz, esanz artistik, latelie, riye, koze, kas enn poz, pa fer nanie.